تصميم اللوجو | خطوات عمليه لتصميم ناجح

فئة كبيرة من الناس معتقدة إن تصميم اللوجو أمره سهل وبسيط، وبتفكر إن المصمم بيجيب ديزاين لوجو جاهز ويعدل عليه أو بيعمله في ساعة أو إتنين، وللأسف الموضوع أكبر من كده بكتير لإن فيه خطوات لازم تمشي عليها بحيث تقدر توصل للهدف المطلوب. 

بس قبل ماندخل في التفاصيل محتاجين نعرف اكتر عن أهمية اللوجو بالنسبة للشركات وليه ممكن شركة تدفع ملايين في تصميم لوجو أنت تشوفه تقول عليه بسيط ومش محتاج المبلغ ده كله؟

اللوجو بالنسبة للشركات يعتبر الواجهة الخاصة بيهم والصورة الأوليه اللي بتوصل للعملاء المتعاملين مع الشركة، ولازم يكون متصمم بدقة وتركيز واهتمام كبير علشان نقدر نعمله بطريقة صحيحة ونوفر فيه كل عناصر النجاح.

كل ماكان تصميم اللوجو فيه شئ من الإتقان والبساطة كل ماكنا فيه راحة عن العميل في التعامل مع الشركة والثقة فيها.

طب إيه مواصفات اللوجو الناجح؟

اللوجو زي أي ديزاين أو عمل ما بنعمله محتاج عناصر ومقومات تساعد علي نجاحه وإنه يوصل الرسالة الخاصة بالبراند بسهولة وبساطة للعملاء.

من أهم المواصفات الخاصة باللوجو

1-  الإختيار الأمثل للألوان

لا خلاف إن الألوان من أهم العناصر في الجرافيك ديزاين عامةً وفي تصميم اللوجو بشكل كبير لأنها أول عنصر عين العميل بتقع عليه في اللوجو فلازم يكون إختيار اللون مناسب لطبيعة الشركة والبراند.

مثال بسيط: اللوجو مصُمم لمطعم خاص بالأكلات المصرية الحلو والحادق فكان إختيار الألوان مناسب لطبيعة الاكلات زي البيتزا والجاتوه. فإختيارك للألوان المناسبة مهم جداً في نجاح اللوجو.

2-  تقليد الأفكار! خط أحمر

من أهم مواصفات اللوجو الناجح إنه يكون مميز ومختلف عن أي لوجو موجود، لإن كل ماكان اللوجو الخاص بالشركة مميز كل ماكان من السهل التعرف علي الشركة والبراند من اللوجو الخاص بيه.

ممكن تحصل ويكون في توارد أفكار، بتحصل كتير بس برضه فيه جزء بيظهر تميز اللوجو عن الشبيه ليه من باقي التصاميم.

اللوجو الظاهر في الصورة في كثير من المصممين بيستخدموه ويعدلوا عليه ويكتبوا اسم البراند الخاص بيهم ومش مدركين إن هذا غير قانوني ولا أخلاقي وممكن يوصلهم للملاحقة القانونية.

بالعكس في التصميم اللي قدامنا المصمم قدر يبدع ويتميز في تصميمه بحيث إنه عبر عن فكرة اللوجو والبراند بتصمميه رأس فيل مع طية الصفحة بحيث تعبر عن المجال للبراند.

3-  أختيار شكل الخط المناسب

إختيار الخط المتماشي مع شكل اللوجو ومواصفات الشركة لا يقل أهمية عن إختيار الألوان المناسبة للوجو.

إختيارك للخط المناسب يعتبر زي إختيارك للملابس الخاصة بيك، فإنت بتختار الخط اللي يقدر يعبر عن اللوجو ويقدر يضيف شئ من التميز في التصميم.

ومن أفضل الأمثلة علي إختيار الخط في تصميم اللوجو وتميزه هو تصميم شركة كوكاكولا.

4-  البساطة ثم البساطة في التصميم

"كن بسيطاً فإن البساطة بذاتها جمالاً" ويليام شكسبير.

من المقومات اللي بتميز اللوجو إنه يكون بسيط بحيث يكون سهل علي العملاء التعرف علي البراند أو الشركة بكل سهولة عن طريق اللوجو وشكله البسيط. ده ومن أهم التصماميم المميزة بالبساطة في التصميم وتعتبر من أكبر البراندات موجودة في العالم هي اللوجو الخاص بشركتي آبل و نايكي.

5-  إجعل التصميم اكثر حيوية

من المقومات المهمة في تصميم اللوجو هو أضافة شعور الحركة في اللوجو بحيث يضيف شئ من الطاقة والحيوية في التصميم وبتكون إضافة مميزة جدا في التصميم، لكن الخاصية دي متنفعش في كل التصاميم زي مثلا تصميم لوجو شركة آبل. ومن أمثلة اللوجو اللي تم فيها إضافة شعور الحركة هو تصميم لوجو موقع تويتر بعد تطويره.

بحيث انك تقدر تشوف إن الطائر رافع رأسه دليل علي إنه يطير في الهواء ومتجه للسماء لأعلي.

طب إيه خطوات تصميم اللوجو الناجح؟

§       الخطوة الأولي: هي عبارة عن إجتماع مع العميل أو الشركة علشان تجمع معلومات تقدر تفهم منها هما محتاجين إيه بالظبط، عايز يوصل للعملاء إيه عن طريق اللوجو، إيه الألوان اللي عايزها تبقي موجودة، تسأله وتطلع بأكبر قدر من المعلومات تقدر تساعد في التصميم.

أجتماعك مع العميل بيكون عن طريق:

1-  إجتماع أوفلاين في الشركة أو في كافيه أو مكان مناسب وتعرض عليه الأسئلة اللي محتاج تعرفها.

2-  أو عن طريق إنك تبعت الاسئلة أونلاين بحيث يجاوب عليها ويبعتهالك تاني عن طريق الإيميل أو موقع التواصل بينكم. ودي الطريقة الأفضل لإنك بتتيح ليه فرصة للتفكير وإنه ياخد الوقت المناسب للإجابة عن الأسئلة.

لو حابب تشوف نموذج للأسئلة، ده نموذج مصغر بالعربي لأهم الأسئلة اللي محتاج تعرف إجابتها من العميل تقدر تحمله من اللينك ده:

https://bit.ly/2YqZeQZ

§       الخطوة الثانية: بتجمع المعلومات اللي قدرت تطلع بيها من العميل وتعمل

Word mapping & mood board

ال word mapping عبارة عن خريطة ذهنية بتكون الكلمة الرئيسية فيها هي إسم البراند وبتحاول تجيب كلمات ليها علاقة بالإسم وتعمل ترابط مابينهم بحيث تساعد في عملية البحث والتصميم.

ال mood-board هي عبارة عن تجميعة لكل العناصر اللي هتساعدك في التصميم أو إستخدمتها في التعذية البصرية سواء كانت صور أو فونتات مختلفية.

§       الخطوة التالتة: وهي تعتبر الخطوة الأهم وهي مرحلة الإسكتش وفيها بتنقل الأفكار بتاعتك من دماغك للورق وكل فكرة بترسمها تطور منها في الفكرة اللي بعدها وهكذا لحد ماتقدر توصل لأفضل تلت أفكار تقدر تعرضهم للعميل.

§       الخطوة الرابعة: هي مرحلة عرض الأفكار علي العميل بتبدأ بأول فكرة، لو عجبته تمام لو لأ، هتعرض عليه الفكرة التانية اللي مجهزها أساساً لحد مايوافق علي فكرة من التلاتة اللي إنت مصممهم وبعدها تطلب نص المبلغ المتفق عليه من العميل ضماناً لمجهودك.

§       الخطوة الخامسة: وهي مرحلة تنفيذ الفكرة المتفق عليها. تبدأ تنفذ الفكرة علي برنامج بيتعامل بالفيكتور، ومن أشهر البرامج المستخدمة في تصميم اللوجو برنامج أدوبي إليستريتور.

لينك لتحميل البرنامج:

https://bit.ly/2XWgm1K

*ملحوظة* برنامج الفوتوشوب لا يُستخدم في تصميم اللوجو.

 

§       الخطوة السادسة والاخيرة: هي مرحلة تجهيز الملفات لتسليمها للعميل بتبدأ تجهيز اللوجو في صيغة:

1-  صور PNG بدون خلفية

2-  ملف PSD لاير واحد غير قابل للتعديل

3-  ملف PDF

4-  نسخة من نظام الألوان RGB لو اللوجو هيُستخدم في تصميمات تُعرض علي الشاشات والأجهزة.

5-  نسخة من نظام الألوان CMYK لو اللوجو هيُستخدم في تصميمات هيتم طباعتها.

6-  نسخة ملونة ونسختين أبيض وأسود للوجو

بيتم إستلام المبلغ المتبقي المتفق عليه قبل التسليم النهائي وبعد موافقة العميل علي النتيجة النهائية للوجو.

كده نقدر نقول إنك دلوقتي بقيت مُدرك أهمية اللوجو والمقومات الأساسية لنجاح تصميم اللوجو وكمان عرفنا خطوات عمليه نقدر نتبعها في رحلة تصميم اللوجو.

نلقاكم علي خير في مقال جديد.